عقد اعضاء لائحة "معكم فينا للاخر" لقاء تنسيقيا عشية انطلاقة الانتخابات النيابية في الاغتراب كمرحلة اولى وصولا الى ١٥ ايار، في منزل النائب شوقي الدكاش في العقيبة بحضور كل اعضائها النائب زياد حواط، السيدة كارين البستاني، الدكتور انطوان صفير والدكتور محمود عواد والدكتور حبيب بركات والسادة شادي فياض وجو رعيدي.
تحدث باسمهم النائب الدكاش وقال "باطار لقاءتنا الدايمة، اجتمعنا اليوم كلايحة عشية انطلاق الانتخابات اللي رح تبدا مع المغتربين بالدول العربية والخليجية وبعدها باوروبا واستراليا وكندا والاميركيتين وكل دول العالم.
بعرف انو كل أهلنا واصدقاءنا ورفاقنا بهالدول متحمسين للانتخاب لانن مش قبلانين يهمشون ويتحدون ويلغون من المعادلة الوطنية.
لهيك رغم كل الصعوبات والتحديات اللي وضعتها الدولة او وزارة الخارجية لتصعيب الانتخاب رح ينتخبو وبكثافة بمواجهة كل المنظومة.
رح ينتخبو لانو صوتن بيعمل الفرق بين الحرية وبين التبعية.
بين حياد لبنان او الاستسلام لمحور الحروب والموت.
صوتن بيعمل الفرق بين استمرار الظلم بالبلد او العدالة.
الفرق بين لبنان بلد الحنين والذكريات فقط او لبنان المستقبل اللي قادر يستقبلن ويحقق احلامن.
لقاءنا كلائحة اليوم للتأكيد عشية الانتخابات انو أهدافنا واحدة ابرزها نستعيد الدولة من اللي خاطفينا ومصادرين مؤسساتا ومقررين يهجرو اللي بقي من ولادا.
خطابنا واضح خطاب سيادي، استقلالي نحنا اللي منتنفس هوا بكركي.
خطابنا حازم وحاسم بالسياسة، ومنفتح على الجميع. عنا خصوم اكيد ما بشاركونا المفاهيم والرؤية السياسية بس ما عنا أعداء الا اللي بدن يغيرو صورة ووج لبنان وثقافتو وتاريخو.
وبالمناسبة اسمحولي وجه للتيار الوطني الحر رسالة واضحة: نحنا منعتبرك خصم، ما تجبرنا نعتبرك عدو. عم قول هالكلام على خلفية الفيديو اللي تفبرك لزميلتنا على اللايحة كارين. العيب والعار بالتفكير، مجرد التفكير، للنزول لهالمستوى من قلة الاخلاق والتحقير. وهالشي بخليني اسأل شو بفرقكن كتيار عن الشيخ اللي هاجم نسائنا وشبابنا واعتبر اسلوبنا بالحياة فسق ودعارة؟
وباسمي واسم كل أعضاء اللايحة مندين كل تطاول وقلة اخلاق تعرضتلو كارين ونحنا حدها بالدعوى اللي رح ترفعها ضد كل مين فبرك وروج لهالفيديو.
ونحنا واياكن رح نضل متمسكين بلبنان اللي بيشبه شبابنا الحر، الواعي، المنفتح المثقف والمتمسك بأسلوب حياتو.
بختم وبقول لكل اللبنانيين شاركوا بكثافة بالانتخابات صوتوا لمستقبلكن صوتو للحرية صوتو للقوات اللبنانية".
غــــــــرد تــــــــعــــــــــــلــــــــيــــــــقــــــــك