أبدى المخرج اللبناني جو بو عيد موقفه من قضية حادث منزل الفنانة نانسي عجرم، فكتب رسالة مطوّلة عبر حسابه على "إنستغرام" بعدما نشر الصورة المرفقة التي جمعته بعجرم في كواليس تصوير "كليب" "ما تيجي هنا".
وقال في تعليقه: "لو ما شاغل معا وفايت عبيتا وبتربطني فيا معرفة شخصية، ما كنت اليوم عم نزّل هل بوست او اكتب يلي رح اكتبو... بكفّي!! بكفّي تعريض كرامات الناس للسوء، بكفّي نشر الكراهية واستغلال السوشيل ميديا لتفريغ الاحقاد والعقد والنقص! كل يوم اشاعة اسوأ من يلي قبلا! ولك كيف الكن عين او ضميركن بطاوعكن؟؟ ليش كل واحد منّا بدو ينصّب حالو قاضي ومحامي؟ ليش جنسيّة السارق بدا تحوّل عمليّة سرقة لقضيّة وطنية؟؟؟".
وأضاف: "مع انو بحياتي ما بحكي عن شخصية فنان اشتغلت معو او تعرفت عليه، بس هل مرّة لح احكي... لح قول قديش نانسي بتبعد عن الشرّ وبتغنيلو، لح قول قديش مسالمة وبتهتل همّ تدخّل حالها بالقضايا الحساسة لدرجة انو كنا نختلف انا وياها بالرأي بهل موضوع... لح قول قديش هيي بتخاف ربّا ومؤمنة بصمت... قديش بتخاف على افراد عيلتا لدرجة الوسوسة وكيف ما بتكون مركزا معي بحكينا عن الشغل اذا سمعت سعلة ايلّا او حسّت انو ميلا ضربت اجرا بطرف التخت هيي وعم تلعب...".
وتابع بو عيد: "نانسي هيِّ يمكن من الاشخاص الوحدين يلي بيبعتو مسّاج قبل ما يتصلو ليشوفو اذا انت مشغول او لاء، وبتسألك عل تلفون اذا عم تزعجك... وهيي مين؟ نانسي عجرم! ايه نانسي عجرم يلّي هو مش اسم عادي او فنان ولد من عبث!".
وأكمل رسالته قائلاً: "اذا عم قول يلي قلتو مش يعني ناسي انو في شخص توفّى وعيلتو خسرتو... الله يرحم ويغفر لكل انسان شو ما ما كانت خطيتو... ومن قلب قلبي بقول الله يهوّنا على اهل الفقيد... واكتر من هيك بقول لشعب سوريا قبل ما قول لشعب لبنان، بقلّن انتو اهمّ واكبر من انو تتحول قضية سرقة واستفزاز وترهيب وحتى قتل لقضية تطرّف وعنصرية... اذا عرفت انو لبناني عامل عملية تهويل وسطو ولو بالمريخ ما حدافع عنوّ.... بتفهّم خوف بعض الجهات السورية على انو يكون في حقايق مخباية، بس هيدا مش يعني فعلاً في حقايق مخبّاية... التحقيق عم ياخد مجراه وما بصحّ الّا الصحيح... بس من هلق لوقتا، بقول احترموا الناس واعراضا... وقفوا الصيد بالماء العكر... واعترفوا انو في حرمة بيت مسالم انتهكت... بس مش اكتر من هيك... ما عم قلّكن ترفعوا علم تدافعوا عن نانسي بس عل قليلة وقّفوا تراشقوا الناس وتتهموهن اتهامات باطلة. العالم ما بقا يحمل هل كمّ من الكراهية.... كل واحد يحطّا ع حالو... ويخاف الله...".
أما عجرم فردّت على رسالة بو عيد بتعليق اختصرته بقلب، تعبيراً منها عن شكرها ومحبتها وتقديرها له ولرسالته.
غــــــــرد تــــــــعــــــــــــلــــــــيــــــــقــــــــك