كتبت جوزفين حبشي: 

الاعلامي ريكاردو كرم ناشر على تويتر، باسلوب شاعري حالم، خبرية خيالية عن "البيض المقلي بزيت زيتون مع رشة سماق" اللي حضّرته ‫فيروز‬ للرئيس الفرنسي ايمانويل ماكرون لما زارها ببيتا وقدملا وسام. 

الخبرية بتقول انو بعد ما فلوا المصورين وكل الموجودين، جاع ماكرون وعزمتو فيروز تا يلحقها عالمطبخ، وطعمتو من ايديها هي وعم بترندحلو "لبيروت"، اطيب بيض مقلي بزيت زيتون ورشة سماق، مع بندورة جبلية من بكفيا، وخبز مرقوق... هالحلم حلو وبيشبه لبنان الرحابنة، بس شو رأيكن كمّل هالمسرحية الشاعرية بجزء تاني كاريكاتوري؟ يلا... 
قعد ماكرون على طاولة الفورميكا بالمطبخ، حد ريما ريما الحندقة، وصار يراقب فيروز هي وعم بتطال مقلاية الفخار شغل راشيا، وتصب فوقها زيت.
- انو excusez moi ma féruz، بس يمكن الـ "اووف" (oeuf) اطيب مقلي بـ beure، نو؟؟؟
- و اوف اوف اوف...فيروز  الذكية ما قالتلو نو، بس هو فهم عالطاير  اول ما طلعتلو بموال"كان غير شكل الزيتون". واول ما طلبت من ريما تناولها راس بندورة من جارور البراد، وقبل ما يجرّب يعلّق، سمّعتو من كعب الدست: "في معنا بندورة، بلدية البندورة، لا مغشوشة ولا مرشوشة، جبلية البندورة".
- واوووو de Mardouchi البندورة؟؟؟ مغدوشة c’est tres beau
- ريما، امي، يا دلي، الرئيس sourd عالاخر.
- واووو، دو صور ايه صيدا؟
- ريما، امي، خلينا نغيّر الموضوع... Dis moi مسيو لو بريزيدان، شو بتغنجك بريجيت؟ نونو؟؟؟ يعني متل ما لولو كانت تغنج نايف؟ ولو مسيو لو بريزيدان، انت قد الـ TGV وبتغنجك نونو؟ 
- -نو، نو، هي ما بتغنجني، انا بغنجها. Vous les femmes خلقتوا لتتغنجوا.
- امي، ريما، سمعتي؟ الله يرحم بيّك عاصي، كان يخليني استعير دست ولكن للينا، تغسّل تياب ريما وانشرهن عل ياسمينا... شبعت تسلملي؟ طيب عن جد سهار بعد سهار تا يحرز المشوار. خلص؟ بدك تروح؟ طيب، بس تبقى ميّل تبقى سئال، متل الاول ضل سئال. انا وياك ما خصنا بالمبادرة الفرنسية، ولا بالناس اللي عم يتقاتلوا، انا وانتَ يا مسيو لو بريزيدان، بيكفينا ضو القمر.