كتب جاد داغر على صفحته:
ليش نحن ضد "الموالاة"... و"المعارضة"؟!
لان المنظومة بلبنان كل عمرها فيها موالاة ومعارضة. الموالاة للتحالف يلي بحقق اكثرية نيابية وبيتحكم بحكومة لوقت محدّد. والمعارضة للتحالف يلي ما قدر يحقق اكثرية نيابية وبالتالي بكون اقلية بالحكومة او خارجها لوقت محدّد.
بالنسبة النا الموالاة والمعارضة نفس الشيء. جماعة صرلهم سنين بيتناوبوا على حكم ونهب وتدمير لبنان.
نحن مش موضوعنا مين معه اقلية نيابية. نحن مش موضوعنا اذا كان الواحد مشارك بالحكومة الاخيرة ام لا. نحن مش موضوعنا: "اذا كنت بالحكومة بتكون انت السلطة او الموالاة واذا ضهرت بتصير المعارضة".
هذا المنطق تسخيف للمشكلة بالبلد وبشكّل مخرج لعودة نفس القوى للحكم ضمن اللعبة التقليدية. نحن موضوعنا اكبر بكتير. نحن بلد تم نهبه وتدميره واهانة شعبه وتفقيره لعشرات السنين. عنا حساب ومشكلة كبيرة مع كل القوى يلي تناوبت وتنعّمت بلعبة موالاة ومعارضة لاربعين سنة.
نحن معركتنا اخراج منظومة الموالاة والمعارضة التقليدية من الحكم. نحن معركتنا محاسبة الموالاة والمعارضة حول كل المرحلة الماضية. نحن معركتنا الانتهاء من حقبة طويلة من حكم الفاشلين ومن نموذج جماعة المحاور الدولية والتمويل الخارجي و٨ و١٤ وتوريث الاحزاب والعصب الطائفي والاثراء بالعمل السياسي. مش معركتنا نفوت على المجلس وناخذ كم كرسي ونلعب بيت بيوت وموالاة ومعارضة.
هذا الموقف، يمكن جماعة السلطة بيوصفوه على انه انغلاق وعبثية... لان بناسبهم طبعا هذا الوصف. ولكن بالنسبة للتغييريّين اسمه جدّية ووضوح بالرؤية. لان نحن مش جايين نلعب هون.
غــــــــرد تــــــــعــــــــــــلــــــــيــــــــقــــــــك