خرج مغني المهرجانات حسن شاكوش في بثٍ مباشر، عبر حسابه على "فايسبوك"، للرد على ادعاءات اعتدائه على زوجته ريم طارق أثناء تنفيذ حكم تمكينها من دخول منزل الزوجية، ونفى شاكوش إلقاء القبض عليه بواسطة قوة التمكين واحتجازه، مؤكداً أنه موجود داخل منزله، وليس من أخلاقه "بهدلة" بنات الناس.
وتابع شاكوش قائلاً: "الحمد لله الواحد لا بيئته ولا تربيته ولا إمكانياته إنه يبهدل بنات الناس أو يجرحهم بأي كلمة وحشة لأنكم عارفين الست والبنت لو بصيت لها بصة وحشة توجعها وأنا لا تربيتي ولا بيئتي ولا عيشتي ولا أهلي ربوني على كده، لكنهم ربوني إني أحترم بنات الناس وعمري في حياتي لا ضايقت حد ولا زعلت حد ولا عملت مشاكل مع حد، لكن في ناس عاوزة تشهّر بيا".
وأضاف: "ربنا مش على كيف حد، واللي بيكبر ويخلي الواحد له قيمة ربنا، وإحنا لما نتزنق بنقول: يا رب مش يا عبد، ومش هينفع أتكلم كتير علشان الجامع جنب بيتي، وبعد كلام ربنا مفيش كلام واللي عاوز يفهم يفهم واللي بيفهم بيريح والظالم وابن الحرام ربنا ينتقم منه في ميدان عام".
وتابع: "أنا عندي في البيت أهو موجود وأهلي وأمي وإخواتي منورني ومشرفني، مش بييجوا لي كتير ولما بييجوا بالنسبة لي بيكون يوم عيد، حبيت بس أطمنكم إن مفيش أي حاجة وإحنا لسه جامدين ومفيش إلا إحنا، وعلشان عندي حفلة بالليل مستني كل حبايبي اللي جايين لي في المعادي".
وأكدت مصادر أنه تم الإفراج عن حسن شاكوش بعد تقديم اتهام ضده من زوجته ريم طارق بالاعتداء عليها بالسب والقذف أثناء تمكينها من دخول منزل الزوجية للحصول على أغراضها الشخصية، ومن المقرر مثول شاكوش وريم اليوم الأربعاء أمام نيابة أكتوبر أول؛ للإدلاء بأقوالهما في المحاضر المتبادلة بينهما، حيث اتهم كل منهما الآخر بالسب والشتم، وحررت ريم المحضر رقم ٤٠٢٥ لسنة ٢٠٢٣ إداري أكتوبر أول.
