بو عاصي: أتشرف باستلام بطاقتي الحزبية من رفاقي المناضلين
16 Nov 202619:10 PM

بو عاصي: أتشرف باستلام بطاقتي الحزبية من رفاقي المناضلين

كلمة النائب بيار بو عاصي خلال حفل تسليم بطاقات حزبية في منطقة بعبدا: 

"بتشرف استلم بطاقتي الحزبية من الكثيرين الموجودين معنا، من المناضلين بقلعة الصمود واهالي شهداء… تعلمت منكن معنى التضحية والتمسك بقضيتنا المقدسة. من كم سنة طلب الريّس اميل شبلي اني سلمو بطاقته الحزبية. الريس اميل كان قائد جبهة الطيونة يوم كنت أنا ولد. استشهد ابنو الوحيد فادي، والريس اميل ما ترك الجبهة. بتواضع المقاومين الكبار طلب مني سلمو بطاقتو الحزبية. كان لازم هوي يسلمني بطاقتي. هيدي هي القوات. الله يرحم ترابك يا ريس اميل. 

رفاقي المنتسبين الجدد للعيلة القواتية، سوى منفتخر بماضينا ومنشتغل بحاضرنا ومنحضر لمستقبل الاجيال اللي جاية. 

بدنا ندافع بكل شراسة عن الدور والوجود المسيحي بلبنان. الجمهورية القوية، القادرة، الفاعلة هي افضل سبيل لتحقيق هالهدف. 

ما بقى بيجوز دولتنا تضل مشلولة ونضطر كل مرة نحل محلها وبعدان يجي مين يعطينا دروس. 

بدّي نخلي دايماً ببالنا انو حزب القوات اللبنانية هو حزب القواعد الصلبة. لو ما كانت القواعد صلبة كان انتهى الحزب يوم اللي دخل الحكيم للاعتقال. 

ختاماً بدي وصيكن. الأخلاق، ثم الأخلاق، ثم الأخلاق. الشهامة، الشرف، الصدق، هني روح القوات. منحافظ على اخلاقنا مع الخصم قبل الصديق". 

وكانت نظّمت منطقة بعبدا في القوات اللبنانية حفلًا لتسليم البطاقات الحزبية إلى المنتسبين الجدد، بحضور عضو تكتل "الجمهورية القوية" النائب بيار بو عاصي، الأمين العام للقوات اللبنانية إميل مكرزل، الأمين المساعد لشؤون المناطق جورج عيد ومنسّق بعبدا جورج مزهر. 

واختُتم الحفل بتسليم البطاقات الحزبية إلى المنتسبين الجُدد وقطع قالب الحلوى.