كتبت جوزفين حبشي في موقع mtv:
نحنا اليوم ٧ تموز، يعني ٧-٧، يعني من سابع المستحيلات مَرّق هالنهار هيك من دون ما اتمنى وقول:
-انشالله الله ينتقملنا نحنا اللبنانيي، من كل اللي عاملين فينا "السبعة ودمتها".
-انشالله منصير كلنا نحنا الشعب اللبناني "سبع البورومبو"، ومنهجم على كل هالصراصير الوسخين، ومنكبن بالزبالة.
-انشالله الله بيحط ايدو مع القاضي بيطار، اللي "سابع" كل مسؤول "مسبوع" لأنو متهم بجريمة بيروت اللي حطت اولادنا واهلنا ومدينتنا وارزاقنا تحت سابع ارض.
-انشالله حكومة حسان دياب توقف عند الـ ٩٧٪ من الانجازات، ما حلو يكملوا الشبيبة الطيبة للـ ١٠٠، كرمال صيبة العين يعني.
-انشالله الحريري ينقطع من البنزين، ويبطل يغط ويطير ويلف ويدور سبع بحور . دوّخنا.
-انشالله حكّامنا الجهابزة اللي مش عارفين يشكّلوا حكومة، ينعدوا من الله اللي شكّل هالكون كلو بـ ٧ ايام. ولو!!! همّوها يا شباب، كرمال صيتكن يعني، طالما انتوا مفكرين حالكن الله.
-انشالله فرضية انو صهرنا يوصل لسدّة الرئاسة تكون من سابع المستحيلات.
-انشالله لبنان بيرجع يصير سابع سما، نكاية بكل مين بشّرنا انو رايحين عجهنّم.
- انشالله الله يلهم العالم واليونسكو وجمعية التراث العالمي، ويقرروا يضيفوا جبل بعبدا على عجايب الدنيا السبعة بدل اهرام مصر. ومعليش قلعة بعلبك بتنطر.
-- انشالله ما يرفعوا الدعم عن الـ 7UP، حتى نبقى شعب لذيذ ورايق ونقدر نهضم كل اللي عم بيصير فينا. اصلا لو ما الشعب اللبناني من جنس البسينات بسبع ارواح، كان قدر يبقى مضاين مع كل هال دياب؟ الله يكون بـ عون هالشعب اللبناني، وينصرو ويعطيه شوية أمل. ايه والله والله لزور سبع كنايس وسبع جوامع اذا استجبت لدعواتي يا الله.
