(تا تا تا تا تأ، بووووم، بوووم ، دج)...

- ولِك ستوب، ستوب، يا خواجه. ايه انت انت اللي لابس تي- شيرت خضرا، يا حبيبي زيح من الكادر، طالع بالمشهد. معقول راسك؟ رح نضطر نعيد الفيلم بسببك. يلا، زيح.. ايه بعد شوي… شو يا كاميرا مان؟ بعدو طالع بالكادر؟ ايه عظيم، يلا… جاهزين؟؟؟ اند اكشنننن…. (تا تا تا تا تأ، بووووم، بوووم ، دج)...

- ولك ستووووب. يا ابو تي-شيرت خضرا، انقبر صف بعيد عن المشهد. نزعتلنا الفيلم ولوووو. يا تسلملي هيدا فيلم "هاي بادجت"، انتاج ضخم، مع انو البلد مفلّس وما حدا معو حق رغيف خبز، بس نحنا ما  منقبل نقدم شو ما كان. المصداقية الفنية اساس عنا، ونحنا مكلفين بس على اكسسوارات الرصاص والقنابل شي مليون دولار، ما فيك تفوت بالكادر وتنزعلنا ياه. يلا زيح… امبلى بعدك طالع، وبعدك عم تتحرك. شو؟ حبيبي هيدا مش برنامج "بوش مع نينكس ما في" وما فيك تقول "باي" للكاميرا. يلا زيح… شو؟؟؟ يا حبيبي اكيد ما فيك تطلع كومبارس بالمشهد، اصلا ما خصك بالتمثيل، اداءك كتير سيء، انو معقول في حدك معركة، والرصاص والـB7 متل زخ الشتي، وانت واقف متل عنتر ورمبو وايرن مان، ما عم بتزخ راسك ولا شوي ومش خايف تصيبك شي طرطوشة من العدو الغادر؟ خلص زيح، ما عندك مصداقية وما بتعرف تمثل انك مرعوب اصلا. شو؟ انت بطل وما بتخاف تموت كرمال القضية والكيان والهوية والوطن؟ اولا، كرشك مش خرج نعطيك البطولة، لازم تكون ممشوق القامة مفتول العضلات واهم شي تلبس تي-شيرت سودا يا غضنفر. وتانيا، لازم  تطفيلنا هالسيجارة عمول معروف، دخانا عامل غطيطة بالمشهد. ما حدا قال لك انو "الدخان يقتل" ايضا؟